Alkisah Manuruik curito urang tuo-tuo saisuak nan diperkuat pulo jo pandapek ilmiah para ahli Geologi, konon dahulunyo danau Maninjau berasal dari sebuah Gunuang barapi nan dinamokan urang Gunuang Tinjau sebagai tungku nan tigo sajarangan disampiang Gunuang Marapi jo Singgalang.

Di zaman antah barantah sebelum agamo-agamo masuak ka Minangkabau dimaso alun barabalun sangkek babaju-baju upiah bapinggan kayu panarahan antah babarapo tahun nan sudah Gunuang Tinjau ko malatuih, begitu hebat letusanyo sahinggo tubuahnyo malayok ka langik biru kamudian tahampeh baliak ka bumi nan mambantuak jajaran bukik di luhak Agam.

Kemungkinan bukik malingka nan mamisahkan Maninjau jo Pariaman, mambateh Ranah jo Malalak, sampai ka Matur taruih ka Lawang, balanjuik ka Palembayan sarato daerah Data munti adolah kaki-kaki Gunuang Tinjau nan tasiso sampai kini.

Mako dapeklah di kiro-kiro bahwa kawah nan bak cando kuali gadang itu baransua di isi aia dek hutan nan tagak bakuliliang, kemudian terjadilah sebuah danau dan itulah inyo Danau Maninjau sebagaimano nan kito temui kini di Agam baruah 36 Km dari sabalah barat Bukiktinggi.

Manuruik kepercayaan anak-anak minang Nagari Tanjung Raya nan batarimo jawek bajawek dari niniak turun ka mamak dari mamak ka kamanakan sampai kini nangko bahwa danau Maninjau ko ado bapahuni, pahuninyo Bujang Sambilan. Yaitu sambilan ikua ikan Rayo paliharoan urang sibunian, sewaktu-waktu ado masonyo malerang di dasar danau naiak marapuang maracun aia shinggo ikan-ikan manjadi mabuak, itulah nan dikatokan urang dengan Tubo. Nah, kutiko itu danau camarelang bak manggilo dan bujang sambilanpun malayia hilia mudiak, panjang ikanyo kiro-kiro 5 dapo, pungguang biru dadonyo sirah radai tagak kuniang bak ameh sunguik tapasang bamego-mego cahayonyo bendang dalam aia. Barangsiapo nan manggaduah menyakiti alamaik inyo ka mati tagak atau raib di gungguang dek rang haluih.

Manuruik curito urang nan punyo curito bahwa Danau Maninjau berasal dari kaba nan banamo Legenda Bujang Sambilan yaitu sapuluah urang badunsanak kanduang sambilan urang laki-laki dan ciek perempuan, namo-namonyo antaro lain : Panglimo Bayua, Malintang, Rambun bamaniak, Kurambi, Pandan, Galapuang, Marasok, Balok, Gatang dan padusi nan paliang bungsu banamo Puti Rasani.

Singkek curito bahwa Sigiran adolah anak tunggal datuak Limbatang Pangulu dalam Nagari mamak kanduang dek bujang Sambilan, Puti Rasani nan manaruah cinto kapado Sigiran namun tidak direstui bujang sambilan, sahinggo dek ulah asuang jo pitanah bungo tak kunjuang jadi putiak niat lah luluah di ganggaman kasiah putuih sayang tak sudah bak bungo kambang tak jadi cinto nan sadang tabangkalai dibao mati masuak ka kawah gunuang barapi. Bujang sambilan dek basutan di mato barajo di hati kandaknyo juo nan ka lalu, akhirnyo Adat nan kawi lah tagoyang cupak jo gantang lah tagisia disinan anjiang manyalak tuan sahinggo bujang sambilan kanai kutuak manjadi sambilan ikua ikan rayo nan mahuni danau Maninjau.

Kemudian namo-namo keluarga bujang sembilan diabadikan manjadi namo-namo kampuang sekeliling danau Maninjau. Datuak Limbatang manjadi Sungai Batang, Panglimo Bayua untuak namo Nagari Bayua, Puti Rasani manjadi Tanjuang Sani, Rambun Bamaniak adonyo dakek pasa raba'a di Sungai Batang, Malintang dan Kurambi manjadi Koto Malintang jo Batang Kurambi di daerah Anam Koto, Pandan, Galapuang, Sigiran dan marasok adolah namo kampuang di pantai-pantai barat Danau Maninjau, balok dan gatang namo jorong di Kanagarian Maninjau pasa, sedangkan Kecamatan Tanjung Raya berasal dari Pandeka Rayo.

Kalau dunsanak memandang Ranah Danau Maninjau dari panorama Ambun Pagi di Puncak Lawang mako lengongkanlah muko agak ka kida disinin akan nampak duo buah tanjuang baradok'an ibarat duo tangan baulua jawek nan tak kunjuang sampai, itulah lambang kegagalan cinto antaro si Sani jo Sigiran.

Silahkan dunsanak batanyo kapado anak Maninjau kalau ado urang mati luluih di dalam danau mako aia danau akan bergejolak hebat sarato topan jo limbubu, ombak basabuang mahoyak bumi sampai mayat marapuang ka ateh aia, konon itulah karajo bujang sambilan nan mambarasiahkan danau dari bangkai, sebab Maninjau danaunyo suci nan berasal dari Gunuang Tinjau nan sakti. Apakah kesucian itu akan tapaliharo salamonyo atau ka kumuah ulah dek bangkai urang hiduik? Anak-Anak Maninjaulah nan akan menjawabnyo.

Akhir kalam panutuik kato kami kirim postingan nangko ka tando cinto jo pusako, mako kok tasabuik di nan bana sananglah hati dunsanak badarai galak urang di kampuang, tapi kok nyampang tasabuik di nan bukan baralah ka malunyo kami muko tak kama disuruakkan, ka dunsanak kami minta maaf ka Tuhan kami mohon ampun.

Banda urang kami bandakan
banda di ranah anam koto
kaba urang kami kabakan
kok baduto kami tak sato.

dikutip dari : Audio legenda Bujang Sembilan.