Maranuanglah awak ciek dulu, ehmmm, assalamualaikum untuak dunsanak kasadonyo.

Dunia nan ko kalo dituruti bana, seso wak dek e.
Dibali iko, dibali itu kalau lai tunai, jadihlah, tapi kalau balinyo bautang, kalau ndak tabayia utang tu, di narako tibo awak.
Baa ka masuak sarugo samantaro urusan di dunia sajo masih tapetai-petai.
Basyukur awak sabananyo hiduik ndak panuah dek utang. Bialah sagalo saketek tapi hati tanang. Daripado punyo iko, punyo itu, tapi dicicia satiok bulan mambayianyo.
Kol dicaliak ka ateh yo busuak hati ko dek nyo. Maraso Allah indak adil. Bakecekkan Allah ko ndak sayang ka awak. Padahal lah jaleh dikatoan di dalam Al-Quran jo Hadits kalau awak ko diuji jo dua hal, kayo ciek, miskin ciek.
Kok kayo, lai berkah kayo wak tu? Lai tatolong dek awak urang-urang miskin tu? Awak makan lamak2, saharago ratusan ribu, samantaro tetangga awak lah mamilin-malin paruiknyo dek lapa. Babangun paga tinggi-tinggi dek takuik urang maliang masuak. Indak peduli jo sekitar. Piti banyak, rumah rancak, apo nan katuju tingga tunjuak. Tapi, lai basyukur awak jo harato nan banyak tu? Maranuanglah sabalum nyawo lapeh di badan.

Nan ciek lai awak diuji jo kemiskinan. Iko nan paliang sansai. Alah miskin, indak pulo tau diuntuang. Shalat jarang, mangaluah sajo taruih, berang ka Tuhan. Bantuak ka talok bana jo api narako tu. Kalau lai takao dek awak jo padiahnyo seso di narako yo hiduik se lah bakato awak di dunia nan ko. Indak paralu shalat, indak paralu mangaji, indak paralu babuek elok. Kaja se dunia tu taruih. Tapi tetap sajo miskin. Baa dek mode itu, lah batunggang tunggik dek karajo tetap sajo indak bapunyo. Itu ranuangkanlah, apo nan salah, kana-kana doso nan lah tabuek. Kana-kana apo nan bakarajoan.

Ha, mode itulah saketek ranuangan di hari nan ko. Mudah-mudahan ado hikmah nan bisa awak ambiak, awak jadikan palajaran.

Assalamu'alaikum.