Neng...
Biasanye abang tuh kagak pernah peduli,
tiap kali ngedenger berita,
nyang model-model kayak berita nyang sekarang ini nyeret-nyeret nama neng.
Bodo amat dah ah sama entu berita.
Sumpah deh, neng.
Kalo neng gak percaya,
neng boleh dah belah dada entu tukang bubur ayam nyang tiap jam setengah enem pagi selalu aje liwat depan rumah abang.
Nyang ketokan sendok ke mangkoknye entu bikin mimpi-mimpi indah abang jadi mbuyaran.

Neng...
Sebelomnye abang tuh gak pernah tau perihal keberadaan eneng.
Abang kagak pernah tau bentuk komuk eneng model begimane.
Eneng katanye sering nongol di tipi?
Tipi abang rusak, neng.
Udah lumayan lama rusaknye.
Belom ade duit buat ngebetulinnye.
Udah gak pernah nonton-nonton tipi lagi.
Mau nonton tipi di tetangga, abang malu, neng.

Sekarang ini pencarian hiburan abang satu-satunye cuma ngisi buku TTS.
Dan abang gak pernah nemuin poto eneng di buku-buku TTS nyang pernah abang beli.
Abang bener-bener buta tentang eneng.

Abang tau berita eneng dari internet.
Entu juga baru.
Sumpah deh, neng.
Kalo neng gak percaya,
neng boleh dah belah dada entu tukang bubur ayam nyang tiap jam setengah enem pagi selalu aje liwat depan rumah abang.
Nyang ketokan sendok ke mangkoknye entu bikin mimpi-mimpi indah abang jadi pada mblingsatan.

Begitu abang tau eneng,
ngeliat poto-poto eneng dari hasil pencarian abang di internet.
Subhanallah, neng.
Ternyata eneng entu bukan orang.
Iye!!! Eneng entu bukan orang!

Neng HH entu bidadari.
Dan abang pun mejadi bersedih hati oleh karenanya.
Maunye sih abang tuh nangis gogorowokan kalo kata orang sunda mah.
Biar orang sekampung abang pada tau,
kalo abang tuh bener-bener lagi sedih.
Tapi abang takut, neng.
Abang takut nanti abang dibilang gila.
Takut nyusul neng HH jadi bahan berita.
Abang gak mau ah, neng.
Abang orangnye maluan.

Maap ye, neng.
Bukannye abang mau nasehatin eneng.
Tapi bolehlah eneng anggap nasehat abang ini seperti ibarat nasehat seorang suami buat istrinye.
Ye a ye ye ye, YAYYY!

Seharusnye, eneng lebih bisa ngehargain harga kebidadarian eneng.
Abis, kalo bukan eneng ye siape lagi?
Eneng lah yang seharusnye lebih tau entu.
Tapi ya udehlah.
Semua udeh terjadi.
Nasinye udah terlanjur jadi bubur.

Semoga Alloh ngampunin kekhilapan eneng.
Semoga Alloh selalu ngelindungin eneng.
Jangan lupa selalu istighfar.
In syaa Alloh masih ada hari setelah hari sekarang, neng.

Mudah-mudahan permasalahan eneng cepet kelar.
Dan setelah masalah eneng kelar,
jangan lupa eneng minta maap sama abang, ye.
Gara-gara eneng, abang harus keilangan kesilent-rideran abang.
Abang udah bukan silent rider lagi sekarang.
Semua gara-gara eneng!

Dari abang, nyang punya pu'un belimbing paling tinggi se Sunda Empire, nyang gak bak pernah bosen buat selalu ngedo'ain eneng, In Syaa Alloh.